Milango ya Uwekezaji ipo wazi-Waziri Kairuki

Na Grace Semfuko,TIC.

Waziri wa Nchi Ofisi ya Waziri Mkuu anaeshughulikia Uwekezaji Angellah Kairuki, amesema ipo haja kwa wawekezaji wa Sekta ya Mafuta na Gesi, kutoka katika Mataifa mbalimbali Duniani kuona umuhimu wa kuwekeza nchini Tanzania kwa kuwa kuna sera na mazingira mazuri ya Uwekezaji.

Kairuki alikuwa Mgeni rasmi akimwakilisha Waziri Mkuu wa Jamhuri ya Muungano wa Tanzania Mhe.Kassim Majaliwa, katika ufunguzi wa Kongamano la tatu la Kimataifa la Mafuta na Gesi lililofanyika Jijini Dar Es Salaam kwenye ukumbi wa kimataifa wa mikutano wa Julius Nyerere (JNICC) Oktoba 2 na 3 mwaka 2019 na kuhudhuriwa na zaidi ya wadau 500 kutoka katika nchi 67 Duniani.

Waziri wa Nchi Ofisi ya Waziri Mkuu anaeshughulikia Uwekezaji Angellah Kairuki (katikati) akimpa Kitabu cha Wageni Makamu wa Rais Mstaafu Dkt Mohammed Gharib Bilal alipotembelea banda la Kituo cha Uwekezaji Tanzania TIC, wakati wa maonesho ya tatu ya Kimataifa ya Wadau wa Mafuta na Gesi yaliyofanyika Octoba 2 na 3 kwenye Ukumbi wa Mikutano wa Kimataifa wa Mwalimu Nyerere (JNICC), Kushoto ni Kaimu Mkurugenzi wa TIC Bw.Matthew Mnali. 

(Picha na Latiffah Kigoda-Afisa Habari TIC, October 2,2019)

Waziri Kairuki alisema dhamira ya Serikali kupitia Wizara yake ni kuhakikisha wanaboresha mazingira ya uwekezaji, ili yaendelee kuwa na tija ya kiuchumi na kuwataka wawekezaji wazawa wa Tanzania na wageni kuona fursa ya kuwekeza kwenye sekta hiyo ya Gesi na Mafuta.

 "Sisi kama Ofisi ya Waziri Mkuu sehemu ya Uwekezaji tunasimamia na kuhakikisha mazingira mazuri ya uwekezaji yanakuwepo wakati wote, wawekezaji wazawa na wageni "hii ni fursa yenu sasa, muwekeze kwenye sekta ya Mafuta na Gesi ili kama nchi tuweze kupiga hatua Zaidi"alisema Kairuki.

Waziri wa Nchi Ofisi ya Waziri Mkuu anaeshughulikia Uwekezaji Angellah Kairuki akiteta jambo na Kaimu Mkurugenzi wa Kituo cha Uwekezaji Tanzania  TIC Bw. Matthew Mnali alipotembelea banda la kituo hicho wakati wa maonesho ya tatu ya Kimataifa ya Wadau wa Mafuta na Gesi yaliyofanyika Octoba 2 na 3 kwenye Ukumbi wa Mikutano wa Kimataifa wa Mwalimu Nyerere (JNICC).

(Picha na Latiffah Kigoda-Afisa Habari TIC, October 2,2019)

Aidha alisema Serikali inashirikiana na sekta binafsi katika kufanikisha mazingira ya uwekezaji nchini na kushauri makundi mbalimbali wakiwepo Wanawake, kuona fursa za uwekezaji kwenye Mafuta na Gesi, rasilimali ambazo zina umuhimu na tija

Nae Waziri wa Nishati Dkt Medard Kalemani alisema Serikali imeimarisha na kuweka mazingira wezeshi ya shughuli za utafutaji na uendeshaji wa sekta ya gesi na mafuta hatua ambayo itaendeleza uchumi wa viwanda na hatimaye kuinua Maisha ya Watanzania.

Waziri wa Nchi Ofisi ya Waziri Mkuu anaeshughulikia Uwekezaji Angellah Kairuki akifafanua jambo kuhusu Uwekezaji kwa Makamu wa Rais Mstaafu Dkt Mohammed Gharib Bilal na Waziri wa Nishati Dkt Medard Kalemani wakiwa katika Banda la Kituo cha Uwekezaji Tanzania TIC wakati wa maonesho ya tatu ya Kimataifa ya Wadau wa Mafuta na Gesi yaliyofanyika Octoba 2 na 3 kwenye Ukumbi wa Mikutano wa Kimataifa wa Mwalimu Nyerere (JNICC).

(Picha na Latiffah Kigoda-Afisa Habari TIC, October 2,2019)

Waziri Kalemani alizitaja faida zinazotokana na gesi kuwa imechangia pato la Taifa ambapo kwa mwaka 2018, pato hilo limeongezeka na kufikia asilimia 2% kutoka asilimia 0.9% ya mwaka 2017 huku akiongeza kuwa, ukuaji huo unatokana na matumizi mbalimbali ya rasilimali hiyo, ikiwepo uanzishwaji wa Viwanda na ajira, Matumizi ya gesi za Magari na majumbani,kuzalisha umeme na utunzaji wa mazingira.

Waziri Kalemani aliongeza kuwa gesi iliyopo nchini Tanzania ina ujazo wa Cubic Feet 57.54 kiwango ambacho ni kikubwa na kinahitaji uwekezaji endelevu ikiwepo uzalishaji wa umeme na hivyo wawekezaji waione fursa hiyo.

Mwisho.