WAZIRI KAIRUKI AFANYA ZIARA TIC, AKUTANA NA KILA TAASISI INAYOTOA HUDUMA KWA WAWEKEZAJI NDANI YA MFUMO WA MAHALA PAMOJA NA KUTOA MAAGIZO

Waziri wa Nchi Ofisi ya Waziri Mkuu (Uwekezaji) Mhe. Angellah Kairuki akiambatana na timu ya Wataalamu kutoka Ofisi ya Waziri Mkuu amefanya ziara ya kikazi kwenye ofisi za  Kituo cha Uwekezaji Tanzania (TIC) tarehe 20 Februari, 2019. Ziara hiyo ilikuwa na lengo la kukutana na Maafisa wa Taasisi za Serikali wanaohudumia wawekezaji kupitia Mfumo wa Mahala Pamoja (One Stop Facilitation Centre-OSFC). Alitumia ziara hiyo kusikiliza namna ambavyo Maafisa wanavyofanya kazi zao ndani ya Mfumo ili kujifunza  na baadae kutoa maagizo ya  kuboresha utoaji wa huduma husika kwa Wawekezaji. 

Mhe. Kairuki akisisitiza jambo pembeni yake ni Mkurugenzi Mtendaji Geoffrey Mwambe

Ziara hiyo imekuja zikiwa zimepita takribani siku tano tu baada ya Mhe. Waziri kukutana na Watumishi wa TIC na kufanya nao mkutano kwa kila idara kwa lengo la kujifunza majukumu ya kila idara, kufahamu changamoto, kupokea  mapendekezo ya kuboresha utekelezaji wa majukumu hayo na  kutoa maelekezo ya kuchapa kazi kwa kufuata misingi ya weledi.

Baada ya Mhe. Waziri kukaribishwa na Mkurugenzi Mtendaji wa TIC Geoffrey Mwambe kwenye ofisi za Huduma za Mahala Pamoja, alikaa kwa muda wa masaa manne na amekutana na mfanyakazi mmoja mmoja anayewakilisha Taasisi zinazofanya kazi ndani ya Mfumo wa Mahala Pamoja ambapo alipokea taarifa ya majukumu na ripoti ya utekelezaji.

Mhe. Kairuki akikaribishwa  na mwenyeji wake Mkurugenzi Mtendaji wa TIC Geoffrey Mwambe  kwenye Idara ya Huduma kwa Wawekezaji

Katika ziara hiyo, Waziri amekuta TIC inatekeleza mfumo wa kielektroniki (TIW) ambao unatumiwa kupokea na kuchakata maombi ya wateja kwa ajili ya cheti cha uwekezaji. Mhe. Waziri alivutiwa na taarifa ya kutumika kwa mfumo na akahitaji kufahamu iwapo mfumo unatumika kwenye ofisi zote za TIC zikiwemo zile za Kanda. Maelezo yalitolewa kwamba kwa sasa mfumo huo unatumiwa TIC Makao Makuu na kwenye Kanda moja ya Kaskazini na zoezi lipo mbioni kukamilika kwenye kanda zilizobaki.

Kufuatia maelezo hayo, Mhe. Kairuki ameagiza TIC ikamilishe ndani ya mwezi mmoja kuunganisha mfumo huo katika Kanda ambazo bado ili pia ziweze kuchakata maombi ya wawekezaji kielektroniki. Kwa kufanya hivyo kutaharakisha zoezi la upatikanaji wa cheti cha uwekezaji na huduma nyingine kwa wawekezaji kiujumla.  Ni wazi mfumo huo unasaidia kuondokana na urasimu, ucheleweshwaji na unarahisisha upatikanaji wa huduma nyingine ambazo ni upatikanaji wa leseni, cheti na vibali ambavyo mwekezaji anahitaji ili kuanzisha mradi wa uwekezaji nchini’ Amesema Kairuki’.

Kaimu meneja wa miradi Bi Phina Lyimo akimpa maelezo Mhe. Kairuki juu ya mahitaji ya kusajili mradi na Kituo

Kwa upande wake Mkurugenzi  Mtendaji  wa Kituo cha Uwekezaji Tanzania TIC Bw. Geoffrey Mwambe alisema iwapo Serikali itawezesha taasisi zote zinazohusika na huduma za mahala pamoja kutoa idhini huduma mbalimbali za uwekezaji ndani ya ofisi za TIC itakuwa ni hatua kubwa uwekezaji nchini.

Mkurugenzi Mtendaji wa TIC akimfafanulia jambo Mhe Waziri alipokuwa akijifunza kutoka kwa Afisa wa TBS

“Taasisi zilizopo ndani ya mfumo wa mahala pamoja zinafanya kazi kubwa, tunachoomba sisi kama TIC ni kwamba huduma za taasisi hizo kwa wawekezaji zikamilike ndani ya TIC badala ya kwenda kwenye makao makuu ya ofisi hizo kufuata idhini ya vibali, leseni na vyeti husika kwa wawekezaji” alisema Mwambe.

 Katika mazungumzo yake na wawakilishi wa idara, Mhe. Waziri aliwataka watendaji wa ardhi ndani ya Kituo hicho kuweka vizuri takwimu za ardhi ya uwekezaji na kushughulikia changamoto za upatikanaji wa ardhi kwa wawekezaji .

Mhe. Kairuki akipata maelezo kwa Afisa wa Idara ya Ardhi Bi Mwanamkuu Hashim

Akiwa katika sehemu ya Mamlaka ya Mapato Tanzania TRA Waziri Kairuki aliagiza  watendaji hao kuona umuhimu wa utoaji  wa  cheti cha walipakodi wakubwa (VAT) ndani ya Kituo ili kurahisisha huduma kwa wawekezaji.

Mhe. Waziri akipata maelezo kutoka kwa Afisa wa TRA  Leonard Mapunda

Nae Kaimu  Mkurugenzi wa Idara ya huduma kwa wawekezaji Anna Lyimo alisema kwa sasa huduma za mahala pamoja zimekuwa na manufaa makubwa kwa wawekezaji kutokana na kuwapo kwa taasisi  nyingi muhimu Kituoni ambazo zinamuwezesha kupata  huduma husika na kwamba marekebisho yaliyotajwa na Waziri yatafanyiwa kazi mapema iwezekanavyo.

“Tumeyapokea maagizo ya Waziri na tutayafanyia kazi, ni maagizo yenye tija kwa kituo” alisema Kaimu Mkurugenzi Idara ya  Huduma za Mahala Pamaoja wa  TIC Anna Lyimo. 

Kaimu Mkurugenzi Idara ya  Huduma za Mahala Pamaoja wa  TIC Anna Lyimo akimfafanulia jambo Mhe. Waziri

Taasisi za zilizopo ndani ya mfumo wa Huduma za mahala pamoja kwenye Kituo cha uwekezaji Tanzania TIC zinajumuisha Mamlaka ya Mapato Tanzania (TRA), Baraza la Taifa la usimamizi na uhifadhi wa Mazingira (NEMC), Wakala wa Usajili wa Leseni na Biashara (BRELA), Shirika la viwango Tanzania (TBS), Ofisi ya Waziri Mkuu Kazi, Ajira na wenye ulemavu, Wizara ya Ardhi, Idara ya Uhamiaji,Wakala wa Usalama na Afya mahala pa kazi (OSHA), Mamlaka ya Chakula na Dawa (TFDA na Mamlaka ya vitambulisho vya Taifa (NIDA).  

Mhe. Waziri pia alipata nafasi ya kuwasalimia wateja waliokuwa ndani ya mfumo wa mahala pamoja ili kupata huduma